Mural ederrak Euskararen alde Urola ikastolako sarreran Pinturako ikasleen eskutik

Ikasturtea bukatzeko, Urola Ikastolako 1. Batxilergoko Pinturako ikasleek erronka handiari egin diote aurre.

Euskara hauspotzea helburu duen murala egiteko proposamena iritsi zitzaien Euskara normalizazioko kideen aldetik.

Horretarako, sarrerako horma desberdinak erabiliz EUSKARAZ hitzaren dimentsio handiko anamorfosia (tokiaren arabera, irudi itxuragabea eta nahasia edota erregularra eta ulergarria ikusten den pintura/marrazkia) burutu dute. Horrez gain, ikasleek beraiek diseinatutako irudiekin sarrerako zutabeak margotu dituzte.

Proiektu honekin euskararen alde apustua egitearekin batera sarrerako espazioa edertzea lortu dute. Prozesuaren argazkiak eta azken emaitzaren bideoa ikusgai dituzue.

Bukatzeko, eskerrak eman Euskara normalizaziokoei, zuzendaritzari, Urbistondo margoak dendari eta bereziki gogotsu lan egin duten Pinturako ikasleei.

Kristalizazio Lehiaketan

Gaur, maiatzaren 17a, 4.DBHko ikasleak Zientzia eta Teknologia fakultatean izan den Kristalizazio Lehiaketan parte hartu dute. Ez dute saririk irabazi baina esperientzia polita bizi izan dute bertan.

DBH1erako ihes-gelak

Batxilergoko 1.mailako IKT ikasgaian, sareetako segurtasuna eta sare sozialen arriskuen inguruan, DBH1erako ihes-gelak sortu ditugu.

Taldeetan bildu eta gela bakoitzerako ihes-gela bana sortu genuen. Maiatzaren 9an, ostegunean, gure lanak aurkeztera Perdillegi eraikinera joan ginen. DBH1eko ikasleak gustora aritu ziren gure ihes-geletatik irteten.

Gure ihes-gelekin ausartzen baldin bazarete bertan dituzue! Animatu eta saiatu ihes-gelatik ateratzen!

IKT - BATX1 ikasgaiko ikasleak.

Belaunaldien arteko elkartrukea

Maiatzaren 8an, DBH1F gelako ikasleak San Martin Egoitzakoekin bildu ziren Urola Ikastolan. Komunitaterako Proiektuen ikasgaia dela eta, 1F gelakoek San Martinekoekin ekintza batzuk burutzen ibili dira. Aurreko hilabetean gure ikasleak jaitsi ziren egoitzara bertako pertsona batzuk elkarrizketatzera, bi belaunaldien arteko ezberdintasunei buruz hitz egin eta beraien gaztearoari buruz galdera batzuk egitera.

Eta oraingo honetan, Urolara igo ziren San Martindarrak gurekin berriketaldi bat egin eta eskola ikustera. DBH1Fko ikasleek aurreko asteetan egoitzako pertsona bakoitzari egindako elkarrizketa erabiliz, beraien autobiografiak sortu zituzten eta poster polit batzuk egin zituzten opari modura. Atzoko ekintzatxo hau aprobetxatuz, autobiografiak oparitu zizkieten hamaiketako bat egiten zuten bitartean. Gero eskola erakutsiz, lehengo eta oraingo hezkuntza eta beste hainbat aspekturen arteko ezberdintasunei buruz hitz egiten jardun zuten.

Oso goizpasa ederra izan zuten eta pare bat anekdotatxorekin ere bueltatu zen bakoitza bere etxera. Ekainean proiektuari amaiera emateko helburuarekin, gure gazteak berriro jatsiko dira San Martinera eta bertakoentzat tonbola bat organizatuko diete. Irrikitan daude!

Zestoara ibilaldia

Prentsa tailerrako ikasleek egindako kronika, irakurgai:

"DBH1eko prentsa tailerreko ikasleak, ibilaldian joan ginen  maiatzaren 2an, 11:20an. Eskolak kontratatu zuen autobusean joan ginen. Zestoara iritsitakoan, hamaiketakoa jan eta gure lana egitera joan ginen. Hainbat lan zeuden egiteko. Adibidez, Gaztetxeko lokal okupatuaren inguruko polemika, Zestoako Santakutzena, herritarren lanbideak, Zestoako lekuen grabaketa, euskalki ezberdinakā€¦ eta gainera, Zestoako alkatearekin egon ginen!! Hiru orduz egon ginen Zestoan eta gero Azpeitiarrak autobusean itzuli ziren. Zestoarrak herrian gelditu ziren. Irakasleek hainbat argazki atera zizkiguten eta hauek dira horietako batzuk:"